LUISTER HAYLEA HEYNS SE NUWE ENKELSNIT, SORRY KLIPHARD!

HAYLEA HEYNS

SORRY is ‘n emosiebelaaide kontemporêre popsnit uit die pen en uitgevoer deur die super talentvolle sangeres / liedjieskrywer, Haylea Heyns en is vir enigiemand wat al ooit deur ’n geliefde in die steek gelaat is. “Dit is ’n liedjie waarin ek seerkry en verwerping oorkom,” deel die sangeres. “Iemand het my onlangs in die steek gelaat en ek het ’n liedjie daaroor geskryf. Ek is seker dat daar baie luisteraars is wat al dieselfde pyn en verwerping ervaar het, maar hierdie liedjie gaan daaroor om dit te oorkom en lief genoeg te wees vir jouself om aan te beweeg.”

Die lied is vervaardig deur Justin Swart en Tom Watkeys en kombineer elemente van pop, elektroniese musiek en gospel om ’n merkwaardige eindresultaat te skep wat in jou kop bly maal lank nadat jy dit vir die eerste keer gehoor het.  

“Vir my verteenwoordig dit persoonlike groei. Dit het lank gevat om die moed en selfvertroue op te bou om nee te sê vir mense, te doen wat die beste is vir my en om lief te wees vir myself,” verklap die veelsydige dertigjarige musikant.

KYK DIE VIDEO HIER:

Dié snit volg in die voetspore van, Blow Your Speakers, wat in 2020 vrygestel en uitstekend ontvang is deur plaaslike radiostasies. 

Haylea het in Empangeni grootgeword en was nog altyd passievol oor musiek. Na skool, het sy BA Musiek en Drama studeer en haar graad met lof verwerf.

Feels Like Christmas – haar debuut-enkelsnit – is in 2018 uitgereik, gevolg deur ’n kortspeelplaat – My Heart Belongs in Africa – saam met die internasionale platemaatskappy, David Gresham Records in 2019.

Sy is in 2021 aangewys as Durban se Kunstenaar van die Jaar tydens die City Awards en het die voorreg gehad om die Suid-Afrikaanse Volkslied te sing voor die toetswedstryd tussen die Springbokke en Georgie by Loftus Versfeld in Junie 2021, asook die Britse Volkslied voor die toetswedstryd tussen Suid-Afrika en Engeland by Emirates Airline Park in Junie 2018.

Buiten vir haar onlangse prestasies, het sy al saam met ander SAMA-bekroonde musikante gewerk, soos 

Connell Cruise, en ’n liedjie geskryf vir Mark Stent se nuwe album, wat in 2021 benoem is as Beste Pop Album.

Sy skryf ook kinderboeke en haar nuutste boek, The Muchness Monster, het onlangs die lig gesien.  

Haylea put inspirasie vir haar musiek uit haar eie emosies en ervaringe en groot name soos Ed Sheeran, Sam Smith en Bruno Mars het almal ’n invloed gehad op haar eie musiekstyl.

SORRY bied ’n unieke kombinasie van kontemporêre popklanke, betekenisvolle lirieke en ’n meesleurende wysie wat jou dwing om dit weer-en-weer te luister. Hierdie enkelsnit beloof nie net om die volgende groot motiveringskreet te word nie, maar is ook die begin van ’n opwindende nuwe hoofstuk van haar loopbaan.

“Die liedjie sê nie dat jy nie diegene moet vergewe wat jou seergemaak het nie, maar motiveer jou eerder om jou lief genoeg vir jouself te wees om niks minder te aanvaar as wat jy verdien nie en om ontslae te raak van die ongesonde verhoudings in jou lewe,” sluit sy af.

KRY DIE LIEDJIE HIER:

1 thought on “LUISTER HAYLEA HEYNS SE NUWE ENKELSNIT, SORRY KLIPHARD!”

Leave a Reply

Education Template

%d bloggers like this: